АСТАНА, 15 мамыр — Sputnik. Ресей азаматшасы Ақсай шатқалында саяхаттап жүріп аяғын сындырып алды, деп хабарлайды Қазақстанның төтенше жағдайлар жөніндегі комитеті баспасөз қызметі.
12 мамырда Ресей азаматшасы құтқарушыларға хабарласып, көмек сұраған. Әйел адам аяғын сындырып алып, тау етегіне өз бетімен түсе алмапты. Оқиға орнына дәрігерлер мен құтқарушылар жіберілді.
"Жедел топ зардап шегушіге аттанып, фельдшер-медбике алғашқы көмек көрсетті. Содан соң құтқарушылар әйел адамды зембілге салып түсіріп, таудың етегінде күтіп тұрған Апаттар медицинасы орталығының қызметкерлеріне тапсырды", — делінген хабарламада.
Құтқарушылар азаматтарға тауға жалғыз шығуға болмайтынын ескертіп, бағдар жайлы туыстарын хабардар етуге кеңес береді. Ыңғайлы аяқ киім киіп, әр қадамды аңдап басқан жөн. Төтенше оқиға болған жағдайда 112 нөміріне хабарласу керек.