АСТАНА, 14 мамыр — Sputnik. Алматы облысында ауыл тұрғыны өзара алауыздықтың салдарынан кәсіпкерді аңшы мылтығымен жарақаттады, деп хабарлады өңірдегі ішкі істер департаментінің баспасөз қызметі.
Оқиға Райымбек ауданында болды, 12 мамыр күні Қақпақ ауылындағы орталық аудандық ауруханаға 40 жастағы жергілікті тұрғын оқ жарақатымен жатқызылған.
Полицейлер белгісіз біреу екі рет оқ атқанын анықтады, оның бірі ер адамды жарақаттаған.
"Оқ атқан күдікті бірнеше сағаттың ішінде анықталып, ұсталды. Ол кәсіпкердің ауылдасы болып шықты, бұрын араларында жанжал болған. Оқ атылған аңшы қаруы тәркіленді", — деп хабарлады облыстық полицияның баспасөз қызметі.
Кісі өлтіруге оқталу дерегі бойынша сотқа дейінгі тергеу басталды. Күдікті қамауға алынды.