АСТАНА, 9 сәуір — Sputnik. Алматыда Райымбек даңғылы мен Желтоқсан көшесінің қиылысында жеңіл көлік пен автобус соқтығысты.
Sputnik Қазақстанға куәгерлер айтып бергеніндей, автобус Райымбек даңғылымен шығыс бағытта келе жатқан, Желтоқсан көшесімен қиылыста жүргізуші бұрылмақшы болған.
Осы кезде Райымбек даңғылымен Volkswagen Passat автокөлігі келе жатқан. Жүргізуші тежегішті басып үлгермей, бар жылдамдықпен автобустың артқы бөлігінен соққан.
Жол апаты салдарынан үш адам – Volkswagen Passat-тың жүргізушісі мен екі жолаушысы зардап шекті. Олар ауруханаға жатқызылды.
Оқиғаның мән-жайын Алматы полициясы анықтап жатыр.