АСТАНА, 1 сәуір — Sputnik. Алматыда Құлжа трактында Рысқұлов даңғылынан төменірек Қайрат ауылына бұрылар жерінде көлік апаты болып, салдарынан екі адам ауруханаға түсті.
Sputnik Қазақстан агенттігіне куәгерлер хабарлағандай, BMW 7 көлігі Құлжа трактымен оңтүстік бағытта келе жатқан, ал Mazda – солтүстік бағытта. Mazda жүргізушісі тоқтап, солға қарай бұрылмақ болады, бірақ BMW көлігін өткізіп жібермегендіктен, қос көлік соқтығысып қалыпты.
Қатты соққыдан BMW артқа қарай шыр көбелек айналып, ал Mazda жанармай бекетінің аумағына бір-ақ ұшқан. Көліктің күл-талқаны шықты, қалпына келтіруге келмейді.
Жол апатынан екі адам зардап шеккен — Mazda жүргізушісі мен жолаушысы. Көптеген жарақат алған олар ауруханаға жеткізілді.
Алматы полициясы оқиғаның мән-жайын анықтап жатыр.