АСТАНА, 12 қаңтар — Sputnik. Павлодарда дәрігерлер шала туған нәрестенің өміріне араша түсе алмады.
Sputnik Қазақстан тілшісіне облыстық перинаталды орталықтың бас дәрігері Айман Оспанова хабарлағандай, қыз бала 30 апта, 6 күн мерзімінде дүниеге келген.
"Нәресте 11 қаңтарда мерзімінен бұрын операция жасау арқылы дүниеге келген. Жедел жәрдем таңғы сағат жетіде шақырылыпты. Біздің дәрігерлер жеті жарымда аттанғанымен, ақтүтек боранның кесірінен науқасқа 11:30 кезінде әрең жектен", – деп мәлімет берді бас дәрігер.
Оспанованың айтуынша, ауылға жеткен дәрігерлер сәбиді қарап, аппаратқа қосып, құтқару үшін бар керектіні жасаған. Алайда жол жабылып қалғандықтан, ауруханаға дер кезінде қайта алмайды.
Сағат 19.00-де ғана жол ашылып, жедел жәрдем 22.00-де қалада болды. Жолда сәбидің жағдайы күрт нашарлап, Павлодар ауруханасының жансақтау бөліміне түскен. Бірақ көп ұзамай шетінеп кетеді.