АСТАНА, 10 қаңтар — Sputnik. Алматыда Манас және Бұхар жырау көшелерінің қиылысында екі көлік соқтығысты, деп хабарлайды құқық қорғау органдары Sputnik Қазақстан агенттігіне.
Оқиға куәгерлерінің айтуынша, Mitsubishi Pajero Бұхар жырау көшесімен батыс бағытта келе жатып, Манас көшесіне солға қарай бұрылмақ болады. Сол кезде Бұхар жырау көшесімен шығыс бағытта Toyota Mark II кетіп бара жатады.
Toyota жүргізушісі тоқтап үлгермей, бар жылдамдықпен келіп Mitsubishi Pajero көлігіне соғылады да, бір қырына аударылып қалады. Ешкім ауыр жарақат алған жоқ.
Полиция оқиғаның мән-жайын тексеріп жатыр.