АСТАНА, 3 қаңтар — Sputnik. 2017 жылы қазақстандықтар "әдемі" нөмірлерге 1,7 млрд теңге жұмсады. Бұл туралы "Азаматтарға арналған үкімет" мемлекеттік корпорациясы қоғаммен байланыс департаментінің директоры Мұрат Жұманбай фейсбуктегі парақшасында жазды.
Оның айтуынша, былтыр мамандандырылған ХҚКО-лар 4,5 мыңнан астам әдемі нөмір сатқан.
"Мамандандырылған ХҚКО-да 1,7 млрд теңгеге тарта сомаға жоғары сұранысқа ие 4 539 мемлекеттік тіркеу нөмірлік белгісі сатылды", — деп жазды Жұманбай.
Сондай-ақ, 2017 жылы 1 415 366 көлік тіркелген.
"Бүгінгі таңда республикада 13 мамандандырылған ХҚКО мен 2 сектор жұмыс істейді. Олар 2017 жыл ішінде 1 778 162 (2016 жылы – 1 209 863) мемлекеттік қызмет көрсетті, оның ішінде көлікті тіркеу туралы 1 415 366 (956 442) куәлік және 362 796 (253 421) жүргізуші куәлігі берілді", — деді ол.