АСТАНА, 3 қаңтар — Sputnik. Яндекс.Такси қызметі қала ішіндегі жолақының неге 9000 теңгеге бағаланғанын түсіндірді.
Танымал PR-маман Нұрболат Тілеу Facebook парақшасында таксидің осы ұсынысы туралы жазып, қосымшаның скриншотымен бөліскен. Қосымша MEGA Alma-Ata сауда және ойын-сауық орталығынан Абай және Өтеген батыр көшелерінің қиылысына дейінгі жолақыны 9000 теңгедей деп бағалаған.
Сонымен бірге, әдетте 15-20 минут уақыт алатын қашықтыққа бір сағат кетеді деп есептепті.
Компания бұл жайтты тексеріп, мән-жайды түсіндірді.
"Тапсырыста Қапшағай қаласы, 5-ші шағын аудандағы 29-шы үй белгіленген. Бұл мекенжайға дейінгі қашықтық 77 шақырым. Оның үстіне жоғары сұранысты ескерсек, қосымша Nurbolat Tileu-дің жолақысы 8970 теңге болады деп есептеген. Кейде қосымша бірнеше мекенжайды ұсынып, соның ішінен қолданушы керектісін таңдап алады", — деп мәлімдеді компания.
PR қызметі клиентпен арадағы мәселе шешілгенін атап өтті.