НҰР-СҰЛТАН, 12 қаңтар – Sputnik. Кремльдегі келіссөздерден кейін Ресей президенті Владимир Путин, Әзербайжан президенті Ильхам Әлиев және Армения премьер-министрі Никол Пашинян Қарабақты дамыту туралы бірлескен мәлімдемеге қол қойды.
"Бұл келісімнің жүзеге асырылуы армян халқына да, әзербайжан халқына да және бүкіл аймаққа, демек, Ресей Федерациясының мүдделеріне де пайда әкелетініне сенімдімін", - деді Владимир Путин.
Армения премьер-министрі Мәскеудегі кездесуде қол жеткізілген уағдаластықтар Таулы Қарабақтағы қауіпсіздікке үлкен кепілдік болады және аймақтың экономикалық кейпін өзгертуге көмектеседі деп атап өтті.
"Атыс тоқтатылғаннан кейін екі ай өтті, бүгін 9-10 қарашадағы мәлімдемеге қол қойған үш ел басшыларының Мәскеуде жиналғаны біздің нәтижеге жетуге бел буғанымызды дәлелдейді", - деп мәлімдеді Ильхам Әлиев.
Еске сала кетейік, қыркүйек айының соңында Армения мен Әзербайжан 1980 жылдардың соңынан бері жалғасып келе жатқан қақтығысты ушықтырды деп бір-бірін айыптады. Мемлекеттер арасында соғыс басталды. Бір жарым айдың ішінде тараптар атысты тоқтатуға үш рет әрекет жасады, бәрі сәтсіз аяқталды.
10 қарашаға қараған түні Ресей, Әзербайжан және Армения құжатқа қол қойып, оның нәтижесі бойынша Әзербайжан мен Армения әскери қимылдарды тоқтатып, өздері иеленген шепте тоқтап, тұтқындарды алмасты. Ал Мәскеу Қарабаққа бітімгершілік күштерін жіберді. Ереван Кельбаджар, Лачын және Агдам аудандарын Бакуге қайтаруға уәде берді.
