АСТАНА, 7 ақпан — Sputnik. Шымкентте кәсіпкерден 9 жыл бұрын таяқ жедік деген полицейлер сотқа енді шағым түсірді, деп хабарлады КТК.
Сонша уақыт ши шығармағанын тәртіп сақшылары өз басшыларының бизнесмен Мықтыбек Бекеевтен қорқып, қызметкерлерінің аузын жапқанымен түсіндіреді. Еңбекші аудандық ішкі істер бөлімінде қызмет еткен Ділшат Хәкімжанов пен Ермек Нұрәлиевті сауна қожайыны әдбен қорлапты. Ал кәсіпкер полицейлердің өзіне қарсы ұйымдасып жала жауып жатқанына сенімді.
"Сол кезде мен де саунада болғанмын. Бекеев қос полицейді сауна аумағына кіргізіп алып, күзетшілеріне арқанмен байлатқызды. Ауыздарына күштеп арақ құйғызып, өзі бетінен ұрып жатқанын көрдім. "Мықтыбек, қойсаңшы" деген сөзіме пысқырған да жоқ", — дейді куәгер.
Полицейлерді қан жоса қылып ұрғанымен қоймай, байлаулы күйі сауна сыртына лақтыра салған. Тіпті Бекеев қалталарындағы жеке заттарын да алып қойыпты. Ал артынша саунаға жеткен аудандық ішкі істер бөлімінің басшылары қызметкерлеріне емес, кәсіпкерге жақтасып шыққан. Осы күнге дейін басшылардан қорқып келдік деген қос полицей араға сонша жыл салған соң ғана сотқа шағымдануға батылдары жетіпті.
Ал сотқа қатысқан кәсіпкердің өзі тілшілерге адвокаты арқылы ғана сұхбат беріп жатыр. Бекеевтің пікірінше, полицейлер өзінің артынан әдейі түсіп отыр екен. Бір жарым жыл бұрын кәсіпкерге тиесілі саунада полицейлер арнайы операция өткізіп, жезөкшелер мен жеңгетайды ұстаған. Жезөкшені сылтау етіп бүкіл саунаны тінтіген тәртіп сақшылары Бекеевке тиесілі 70 миллион теңгені қолды еткен көрінеді. Ал тінтіген полицейлердің үстінен жазылған шағымнан соң ішкі істер департаменті кәсіпкердің артынан май шаммен түсіпті.
"Менің қорғауымдағы Бекеевтің айтуына қарағанда, оны Жүнісбеков және басқа да полиция қызметкерлері шақырып алып, арыз жазуыңды тоқтатпасаң тиісті шаралар көреміз деген. Осыған байланысты болса керек, Жүнісбеков 2009 жылы болған оқиға бойынша менің қорғауымдағы Бекеевке қарсы қылмыстық істі тергеген", — дейді Мықтыбек Бекеевтің адвокаты Шымырбай Ағабеков.
